جے پور: بھارتی شائقین آئی پی ایل کی چیئرلیڈرز کو بھی ہراساں کرنے لگے جس کی ویڈیو وائرل ہو گئی۔
راجستھان رائلز اور سن رائزرز حیدرآباد میں میچ کے موقع پر کچھ تماشائی مسلسل چیئرلیڈرز کو گھورتے اور ان پر آوازیں کستے رہے، کچھ لڑکیوں نے جواب بھی دیا مگر وہ پھر بھی باز نہیں آئے اور نازیبا جملے کسنے میں مصروف رہے، صورتحال کو دیکھ کر ایونٹ مینجمنٹ کے کچھ آفیشلز وہاں پہنچ گئے اور چیئرلیڈرز کے ساتھ کھڑے رہے۔
اس واقعے کی ویڈیو سوشل میڈیا پر بھی وائرل ہوچکی، لوگوں کی جانب سے کچھ شائقین کے بیہودہ طرز عمل کی شدید مذمت ہورہی ہے۔
یاد رہے کہ چند روز قبل بھارتی اداکار شاہ رخ خان کی فرنچائز کولکتہ نائٹ رائیڈرز کے کپتان نتیش رانا کی اہلیہ ساشی ماروا کو نامعلوم نوجوانوں نے پیچھا کرکے ڈرایا، جس کی ویڈیو انہوں نے سوشل میڈیا پر اَپ لوڈ بھی کی جبکہ پولیس نے واقعہ کی رپورٹ بھی درج کرنے سے انکار کردیا۔
